منتديات عسل بغداد

  منتديات عسل بغداد > >

منتدى الشعر الشعبي العراقي اهلا وسهلا بيك واكثر بالوياك .... القلب قبل العين فز وتلكاك

ديوان الشاعر..ايهاب المالكي

منتدى الشعر الشعبي العراقي

ديوان الشاعر..ايهاب المالكي

قصيدة امـــــــــــــي اسم امي امان علليخافون ونقاطه اتصير بالظلمه قناديل انه امي الكاع هاي الربت رجال بيهم خورست حلك المقابيل وقوره وخيره ومن اهل الله ينكال ام كول وفعل موبس

انشر الموضوع
قديم 07-22-2012   #1

المهندس دوت نت
عسول شاغول
 
الصورة الرمزية المهندس دوت نت

العضوٌﯦﮬﮧ » 40469
 التسِجيلٌ » Apr 2009
مشَارَڪاتْي » 124
 نُقآطِيْ » المهندس دوت نت is an unknown quantity at this point
Icon38 ديوان الشاعر..ايهاب المالكي

قصيدة امـــــــــــــي
اسم امي امان علليخافون
ونقاطه اتصير بالظلمه قناديل
انه امي الكاع هاي الربت رجال
بيهم خورست حلك المقابيل
وقوره وخيره ومن اهل الله ينكال
ام كول وفعل موبس اقاويل
كرامتهه نخلهه وحيله جبال
وصبوره ولو تثور اترد اساطيل
ام جلمه العدله الماتزل يوم
وذهب كل حرف من تحجيه مثاقيل
وحظنهه تراب صح بس لفظا تراب
اذا هزت حظنهه اتذب تماثيل
واذالولت ولد يبني دلول
نخلهه يطش شعرشعبي ومواويل
وذا عاشور مرهه دموعهه اتطيح
مواكب تلطم بقامه وزناجيل
امس السافر من اولادهه وراح
تمر لهناك ودتله مراسيل
امي مشيله من زاخو للفاو
وطرف شيلتهه يوصل للمحاويل
كد مالبست اسود دمهه محروك
واذا تنزف جرح تنزف براميل
انه ارض العراق اسم امي للزين
بس علشين تتحول عراقيل

نسر العراق
علة الحيهم نشامة الوطن ربانة
اذا واحدنة ضيم ايصيب جيرانة
بعد هدة عراقي.. المنيطگ بركان
كبر الاطلســـــــي مايطفي نيرانة
ربينة ابيت واحد حظن واحد چان
لسة البيت واگف بامل ذكرانة
اول ماتطب للبيت ماكو ابواب
من سعف العراق البيت بيبانة
بنينة ابطيب اساسة وحاوطيناه شوگ
ذني اثار ادينة ابوجه حيطانة
كتبنة اهنا عمر وهنا علي وعباس
طب ال كربله والنجف تقرانة
اكلنة بزاد واحد من فرد ماعون
ماتاكل وحيد الوطن وصانة
گدما لمة حلوة من ايصير الزاد
هور وجبل يگعد ياكل ويانة
چن بيت ابوذية چان ذاك البيت
وبگاع العراق الوكت خطانة
اذا تفرز شطرعن شطر معنة ايروح
من نلتم فقط يكتمل معنانة
ممكن نختلف بس اختلاف اخوان
مانعرف اتبات گلوب زعلانة
لذلك حتة مانتفارگ اثبتهة
جماعية لگوهة گبور موتانة
الف بئسا لمن حاول يشب النار
او لوّن غايتة بالوان دخانة
ولف بئسا لمن حط بالشوارع موت
عله ظهرالجنايز جثث خلانة
طبوبينة رادو اعداء انصير
حتة البيت ذاك اتطيح عمدانة
وحگ نسر العراق العله البيريات
وبهيبة وگفتة ابوجه عدوانة
وحگ طبگة اجناحة الرجفت صوبين
بي يدرون اذا تنفتح جنحانة
علمنة الوطن غاية حياة الموت
وبجذع النخل بالحرب شدانة
وقسم وياه قسمنة من ايمسة الضيم
نمتد حدر جدمة ارواح يلكانة


الى صديقي في العسكرية سابقا
ايدك عالزناد اترددت ليش
اوعلية شلون درت البندقية ؟
ابسدك قفلت بوابة الخوف
اوفتت گدامك الباب المنية
الرصاص ايزخ علية اوبالي وياك
اگول ابشدتي بالك علية
واصب دم وانحني ومن التفت ليك
ارد ليهم واسكّت مدفعية
على صوتك صلت رغم الجراحات
هاك احسب ابصدري اجم شضية
انته وياي گتلي اوگتلك اوياك
سوية نعيش ونموّت سوية
اوحلفنة اثنينة واقسمنة بالله
اوحلفنة بحيدرا والغاضرية
او تعاهدنة ابقضية انعيش ونموت
المهم بالناتج اتعيش القضية
او لبسنة هدوم وحدة ملونة تراب
او اسم واحد اسمهن عسكرية
او كعدنة شكد سوية بوحشة الليل
اخو واحدنة ويصبّر خوية
او جذب طاري الهوية ان چان جبناه!!
رغم بركابنة اقراص الهوية !
جن دجلة وفرات اتحاظن وياك
او جنة البصرة ويالناصرية
انام بواجبك واغفة بملئ عين
وتظل للصبح عينك علية
اشيل شلون هسة تريدني شصار ؟
اوعلية شلون لازم بندقية؟.
اسلاحك مستحي والمخزن اندار
عكس وانشلت اجزاء البقية
تعال ابني العراق ابغير الانكاب
النكاب ايغطي وجه الطائفية
الغريب ايريدك اتذل عزتك ليه
وامك رضعتك غيرة وحمية
العراق ايكول ذمة اتجيبة وياك
وعلى جف دجلة ودالك وصية
ابونة بمعركة و دارت عليه خيل
او وحيد بغيرنة واكف خطية
خنتلاحكــــــــة ونقاتل وياه
لحد مانهلك او نوكـــع ضحية



كبرت بالمساحه هوايه بغداد
حتى ويالمدن ماتبقى فجوه
كبرت وانتجه علجتافهه الطاح
عكس اليكبر وتنحطلة تجوه
جانت حلوه بس لاهسه موهيج
لا بل هسه يمكن احلى حلوه
احير ابينهه وبين الورد دوم
ردت شكد اميز دون جدوه
اهي مزروعه بي ؟لو هو مزروع ؟
كلاهم من تجي من دجله يروه
ولو باك القدر ضحكتهه بس لا
من جف القدر خذناهه عنوه
زلم طاحت وكلنه فدوه اليطيح
كنه الموت حق والدنيه نزوه
كالو زين اذ تتهاوه بغداد؟
كلنه شلون ؟افه !ماكلنه فدوه
هده بيهه الوضع مو بالنفط كون
اضافه لعاصمه نسميهه ثروه
خلتحجي الخوذ من زعلت اشصار
اخذنه الحك تره ماخذنه عطوه
صح مانختلف محتاجه الاعمار
بس الالف خطوه تبدي خطوه
لتكلي اليعمر الا بي حيل
شسوي بحيله اذا ماعنده نخوه
اكو سبعين عمره ويفزع وياك
واكو عشرين بس تفزعه كوه
بعد حتى الشعرمانقبل يكون
اذا يوصف مشاهد بيهه قسوه
انا بعازة قصيدة تعمرالطاح
مامحتاجك تسمعني عبوه
صح بيه جرح بس رايد انساه
كدرت اتجاهله وخيطنه توه
ماخيطته هيج براحت البال
لا غصبن عليه خيطته كوه
جرح تحيي من تشوفه الشواجير
بس يموت اذا سمعته غنوه
غنوه وكون غنوه بيهه بغداد
وكون الشاعر ايغنيهه هوه
لان الشاعر ايغنيهه بحساس
وبالحساس القصيدة تطلع اقوه

شاعر
شاعر واحير من ارد او صفك لان
لو ما هواك شلون اعرف الشعر
ابيات جلمة ومن اقسمهه الك
من كاعك انه يجوز اوصف شبر
مرات اوصفك شيلة امي البقت
شباج عفة ومنهه نطلب نذر
ومرات اوصفك جربة علمشرعة
وجفوف غيرة وطفله تبجي وخدر
ومرات اوصفك لوحة من ملحمة
بيرية بيهه ويمهه واكف نسر
ومرات اوصفك ياعراق بنصب
للوحدة بي عثمان شايل جسر


تقرير اقتصادي
اعلن عن شرح وضع اقتصاد السوگ
حتى الماعرف خليعرف احوالي
سعرالورد نازل وارخص من الماي
بس سعرالبنادق مانزل عالي
اهنا عدنة بمخطط قيمة الدولار
يصعد بس مقابل لگمة الغالي
ولان كثرة مقاهي ولاسباب هواي
دارت عالعصاير شغلة دلالي
اهنا اجود انواع الغام للتفجير
اخذ من عدهه اخوي وفجراطفالي
اهنا حجم الجياع انخفض نصف الچان
ماشبعو ولكن شبعت رمالي
اما عن مؤشر اسهم التصدير
نلاحظ يرتفع من تشرد رجالي
عرض موت وطلب بس عالحياة انشوف
مو قصة رخيص وجيد وغالي
لان نوعية وحدة الموت سوة اشكال
بس بالجفن يمكن ينحل اشكالي
مما ادى ان توگع اهواي اسماء
وتفند سوالف نخلي وجبالي
عذرا سادتي ان ترد عندي امثال
عذرا لاتقاس من اضرب امثالي
انة محمل ذهب بس حصتي العاگول
ردت ارتاح عود وزادت احمالي
اما عن حركة البوگ بالاسواق
كلش واضحة ومفرزنة ابالي
مثل طبع المعارك في نزال السيف
من يوكع حرامي ويبرز التالي
رادوني انشنق وادعم انتاج السوگ
فعلا بالعراق انصنعت احبالي
اما عن عقود الغاز والبترول
كالزيتون ازرعة وتحصد اجيالي
انة مخزن امل من نصف قرن الراح
نفذ تاريخ صبري وفسدت آمالي
قد نشهد تغير دعم الامريكان
اذا طلقو سراحي وفكّو اغلالي
او قد تبتدي حملة اعمارالموت
ويرد راسي علچتفي وترجع اوصالي
بس ماريد عون وخبرة من الروس
انة رايد الگطع روس عمالي
المهم حملة اعماراترد حياة الناس
مو تندفن حفره وتنحفر تالي

رسالة حبيبة الى قبر حبيب دفن حيا في احدى المقابر الجماعية
فـــــــــــــــــــــــــــــــــــــــــــــــــ ي
حب 91


جم سنه وانساك وتموت....
القصايد جم سنة ..
جم سنة متاني خيالك
من ورى القضبان يبعد..
جم سنة..
جم سنة وكلبي مثل شجرة وفة...
ويهزهه شوك
ولنته يمي
ولانه اشوفك
ادري واقع حال بعدك صار عني
مارضت روحي اعلمر تكضي بدونك
حتىجلمات الشعر ماتهوة غيرك
ليك تاخذني رغم تعرف مصيرك
هذا حالي وهاي مرت جم سنة
جم سنة كلي ..
عسى بروحي بعد ...
بيهه صبر
كلي تسع سنين
عشر سنين
صدكني انتظر
روحي ملت كل مواعيك هذيج
وانه هم جم دوب ادورلك عذر
ياحقيقة تحولت بيدي خيال
وحب طفولة وباكتة سنين الزغر
انته ...
يلكل ذنبك احلامك جبيرة
اكبر من الدنية هاي
انه راسم حلم البعمري علكدك
يا هومثلك ؟؟احلى منك ؟؟
ياحبيبي ودنيتي ولذة هواي
هواي دورتك ...
بمن غيري لكاك
هناك بم المدرسة وشارعنا ذاك
وعلكتلك كل كتر منهم قصيدة
وكل قصيدة حروف تبجي بدم عليك

زنزانتك تدري بهوانه
وتدري بيك اشكد جنت مشتاكلي
وردة
مثل وردة جنت والسجن نار
وروحك التارفة الظلم يطلبهه ثار
موت بيه تعيش الك روحي مزار
ياحبيبي يلوكلك لون النهار
انته ياجلمة وطن كلهه مشاعر
وانته ياطلسم بقيت بروح شاعر
دور القاموس كله ومالكاك
ومن وصلحلهه لكه اسمك بالمكابر
12 عام وفترك زنزانتك

عرش بلقيس
ها ياموطني هانـــــــــت وجرحــــــك طاب
نـزف صــــــح بس تلايم لــــمن شـــديتـة
ولو ســاعات يصحة الجرح مــن تـــــــنام
بس ســـــــهلات ذني الكلف عديـــــــــــتة
گضت وتلاشـــــــــت وصارت سوالف ليل
جزة شرهه وعــــــــبر والوگــــــع لمــيتة
طلبت مراد مـــــــن روحك ابوكـت الضيج
فكت ضيجـــــــــــــتك والـــــنذر وفـــــيتة
بما لاتشتهي علـسفن هبـــــــــــــــت ريح
وانتة استثـــــنتك والبحـــــر فـــــــجيتة
غض الـنظر عن اســــــــباب كل ماصـــار
رفت رايــــــــــــــــتك والـــحــــمل حطيتة
يقينا ماطحت بس حــــــــجر عثـرة يجوز
راد يطيــــحك وبالعصـــــــــف طــــــميتة
گــــــالو كبوة بس موكل جــــــواد ايطيح
جــــــــــــوادك مثـــــلك عــــللوعر ربيتة
مايفلت رسن يلتف بچــــــــف خـــــــيال
بس يمكن شـــــــوية الرســـن رخيتـــــة
گلة المـــــــــــافزع والفزع فـزعة خوف
گـلهــم مامتت والـــــــچفن لفيـــــــــــــتة
گل لجــارك الحشمت بــــــــــــــــي للعون
بية انفجرعونك لـــــــــــــــــــمن وديـــتة
شبت نارهــــــــم بس لطـــــــــف بيك الله
برداً گالـــــــــــــــك والشــــــضا اتلگيتة
رادوهه برگبتك بــــــــــس اجت بالــريش
وچـف الرادهه مــن الچـــــــــتف شلــيتة
اهي لحظة قدر فرزت مــــــــــواقــف ليك
اخــذت اســـــــــــــــرارهة والـقدر فريتة
عرفت اولادك ابـــــــــشدتك چن يعـگوب
صــافحت الشهــــــــــــــــم والغلط ربيتة
ولو بيهم جــــــفة من درة بحضنك مـوت
ماچن بي غـفة ولاگــــــــــــــبل هــزيتــة
رغم كل هذا مابــــــــــــــينت زعل البـيك
لابـــــــــــــــــل فوگهة الزعلك رضــــيتة
بخت دجـــــــــــلة وفرات الدفــع ماقدكان
امــــــــــــراً كان مقضـــي ابوّرع رديــتة
ابدعــــــــــائك ساجداً خاشعاً من صليت
لو داعي علــــــــــــخصمك وذر سويتة
لكن دعوتك چانت ابنـــــــــــــص القول
الاهي احفظ وليــــــــــــدي الذخر ربيتة
ماترغب الــــــــــذل انتة والغيرة احباب
بستهة ودنــــــــــگت والنبض جســيتة
وجه الذل زليخة وحــــــسن يوسف بيك
ذبت ثوبهه والنــــــــــــــــظر غضــيـتة
العراق انتة الذي ماوگع تاجــــــــــك لا
بس لحظة وضوئك نعم ذبــــــــــــــــيتة
اولادك ردّتة عرشـــــــــــك مثل بلقيس
ردوه وانحـنّو والقســــــــــــــم اديــــتة

الى العرب الذين لم يقفوا الى مع العراق مع احترامنا وتقديرنا لكل الذين كانت لهم وقفة مشرفه
سلمت بثكل عالعرب من مــــــــــريت
وانة اشعر سلامي مختلط بي غـــــل
صاحولي الاخو سامع بشي ؟زعـلان
كل احنة بخدمتك حاضريــــــــن الكل
كلتلهم بعد لمن كضت ماريد ؟؟
اخو وكت النفاهه بالشدد يجفل
شلت حملي بلا ماصيح عونة ويـاي
لغير الله ركبتي ماردتهه اتــــــــــذل
ثكيل الحمل صح بس يمكم اتناســاه
واعدل متني كوه حـــــــــتى لايهدل
وامر من بينكم واسمعكم تكولــــون
واضـــــــح من مشيته مو ثكل يحمل
وانه حدر العباه ديرة يتم ضميت
جن ضمت رسالة جايه من الخل
انه بملجا عباتي ايتامي اضمهم دوم
هيج اسكف عباتي حتى اكبـــر الظل
سمعوبي ولكن شوف ماشـــــــــوفو
جربو انتو اسئلوهم شايفينة الــــذل
يكفلون اليتم ايتامي هيج سبـــــــاع
شايفلك يتامة بالتيم تكــــــــــــــــفل
يبجون الصخر بس همــه مايبجون
بس علليتامه عيونهم تهمـــــــــــــل
اريد البس هدم ماينطي منه خيوط
خيط يجرله خيط وينتهي ويهـــــزل
انه الشعب الذي ماشاكفت بجـفوف
حتى بالسواتر ارفض انه اخـــــــتل
نعم محتل ولكن لاحتلالي اســــباب
وصلتواليــــــــــــــــــــه حتى لايبذل
جــهد كولو البوارج وصلــتنه شلون
من دمنة البوارج مايـــــــمن يغسل
فجرتو الهمر عندي وبنص السوك
يم باب الـــــمدارس والاطفال اتحل
بنفس القنبلة اتطكون عصفورين
هم تضعف امريكا والعراق يــــــــقل
لو يصبح فعلكم كد خطبكم جــــــــا
تستجرء امريكـــــا والهمرتدخل
لكن بس حجي وبالبيت الابيــض غير
طافيــــــــــــــــن وعلي دخـــانكم يفتل
افزعكم صحــــت ياعــــرب حيهم وين
شمايرتــــــــفع صوتــي ركابكم تنزل
حتى الخيل من تســـتمع حـركت الذيب
ماتهجم ولكــــــن علاقــــــــــــل تصهل
هبت بس هدت وجفلت ريح الموت
وانا هبيت بيهه ومـــــــن اهب تجفل
وفرزنته الركض من بيــــــه شبت نار
شايل ماي بيدة بــــــس لكوه يشــــعل
الوح الشمس ماين دون مادك باب
اخـــــــــــذ من ضواهه للعرف واعزل
انه بالمطرقة من اطرق الغيرة اتصيح
مولاي بقيافه زي حرس تدخــــــــــــل
وامرهه اذن فاتي بـــــــــراس الخوف
تجــــــــب سمعا وطاعة والراس يمثل
لقنت القـــــــــــــــــنابل درس ماتنساه
وكد ماخوفتهـــــــــــــــــه بالغلط تنزل
واسمعهه لمه تكل للرماهــــه ارجوك
دم البي حمية محتــــــــــــــــــمل يكتل
عراق انه انلفظ من غير ال تعريف
ضافوني عليهـــــــه حتى اعرف الال
انه اضعاف الرباع محللــــــة الزينات
الي وماكالي الله بــــــــس شرط تعدل
لذلك قررت بالـ بس اخو محسوب
مـــــــــــــن قائمة اخوتي قررت ينزل

قصيدة صبرا يا وطن
صبرآ يا وطـن بس صبرك ليا وين .؟
كافي تگول باچـر محد بحالـــك..

گوم انتَ عله حيلك وأذبـح الجـلاد
عشرينــك بعدهه تحشم بفالك ..

مثل ميمون اشوفك مارضه عله الصار
أركـض وأنتــفض بـــس وينــه خيآلــك ..!

شلون لهسه ساكت وأنتَ أبن شعـلان
وكــل عشرة بگبر متوسدة اطــفالك ..؟

شلـون انطاك گلّبك نبقـى مذبوحين
مضيفك سده كافــي وكَسر دلالك ..

صفت لأهل الكراسي وكلهه تآكل بيك
وانتَ( أيـوب )بعــدك ساكت شمالـك ..؟

ناس تبيع بيـك ونآس بيك تبيـع
وجوعان الشــعب وميتمّـة عيالـك ..

اهلك بايعينك لليــصّح شـرآي
والف شرآي واگــف يآكل بجالك ..


حزنانـه الشـوآرع والطريق طويـل
ومتيّه وطنــه ويـــــاهو ليطلعـه ...؟

خمستالاف حاكم وآنه دمي يسيـل
وبكــل بيت ميت .. كل فرع قطعـه ..

أبنك. يكتل ابنك أدري ترهم ويـن .؟
غدر وبظهـر اخوكـ الخنجر تزرعـه ...

بعده الوضع نفسه وباقي نفس الحال
نفسه الرآح اجانـه وضربه في تسعـه ...!!!


روحي يمك ...
عودتهه اتحن الك مثل النوارس
من تحن بشواكهه لماي الشواطي
روحي يمك ...
وانه باقي بلايه روح سنين عايش
فاركتهه هواي من يوم العرفتك
روحي يمك ..
نجمة اول ماعرفتك
فوك ليل رموشك بود علكتهه
روحي يمك قصتي ومنين ماتقراهه هيه تصير قصه
روحي يمك ...
فرصه الك جانت وانه المامره منك خذت فرصه
ترجف جفوفي منريد اقره القصيدة
واحس بيك تشكك اوراقي الاحطهن عالمنصه
عوفني بداعت عهد وياي تبقه
مالي حيل اتملك والحيل ورقه
بيك ياسوك المشاعر كلشي صار
وموعجيبه وياك كلبي ايصير صفقه


ليش نبجي ؟
وليش خلينه الدمع ينزل رخيص ؟
وليش كل لحظة جرح نكتب شعر
وليش ذبينه الفرح والهم جبير
وليش رغم اخطائنه نحب نستمر
ليش مذبوح الوفه بلحظة خداع
وليش مات الشوك والحب يحتضر
وليش خلينه المشاعر بس كلام
وبالعتاب شفافنه شكد تعتذر
اه منك يازماني تغيريت
وجسرطبعك صاير وماتنكدر
المشه بصفك خذيته ومدري وين
والرفض يمشي انوله من كل كتر
والغدر ناسه رفعته عللجتاف
وصاحب الصاحب كضه سنينه عسر
اه يادنيه صدك مابيج امان
وفرق بين اليوم وايام وايم الزغر
جانت كلوب البشر تنصع بياض
هسه لون كلوبهم ماينحزر
ممكن بلحظة يجيك بكل هدوء
وممكن بلحظات يتحول نمر
وانه محتار ويروحي بهالزمان
ساعه اشد روحي مثل شد الحديد
وساعه الين الروح حد ماتنعصر
وساعه احس روحي على هدومي غريب
وخلص صبري ومابعد بيه صبر
وساعه اذب دمعي وانه كبال
وبيني بين الموت ساعتهه شبر


كل عقلك
كل عقلك فرح تلكة بحلك بــي نـــاي
من تلمح عيوني راح تلـكة الـــــرد
شترجى من المكابر غير طاري الـمــوت
ومابيهـــــه المشانق غير حـــل وشد
صدكت الحجي او املت بيك احــلام
لكن مالكيتك لمن صارت جـــــد
انا ردتك تجيني بوكت بــــي شمات
جنت اسمع حجيهم من امريشـــتد
الى ان ايسوا منك ذروني ارتـــــاح
لكوغيرك وغيري والحديث انســـد
تجي هسة شبعد قصـــرت لوماجــاي
وين الكة الشماتـــــه حتـــى اكلهـــم رد
الك يد بحياتي اعـــــترف ماناســـــيك
بس انته مماتي هم الك بـــي يــــد
انه ردتك تجي الســـــــــاف الوكع تبنيه
هسه الساف سهلة بس اساسه انهـــــد
حجر عثرة الجرح حطيتة كبـــل الروح
و مأمن بجيتك راح بــي تصـــــطد
ولو حد بالبدايـــــة الك ماخـــــليت
بس حاولت تالي ردت احطـــلك حد
تريد شفاف تفرح وانه شرد انطــــــيك
اريد افرح ولكن مستحي مــن الــخد
غرك خدي دمع وشلت بي مافـــاد
اتصور فوك جفني ردت احطــن سد
جنت اسكت كبل لو هددتـــــني تروح
اخاف تروح مني عـــن زعلتـــــي ارتد
هسة انته رحت وانه من اخــــــــاف مـــنين
انه تناسيت كلشي واعتبرتــــك نـــد
شغير بيك كلبك مسـتحيل اتصـــــــير
هواللون الاسود يبقى لــون اســــود
كلما جايني جاي اقتنــع وانـــساك
وبكل امنياتي جاي احــس ازهــد
اله اسباب الزعل مو عن فراغ أيـــــــــصــير
ماصار الجزر لوما ايصــير الـــمد
نفسهن ماجبت فد شي جديد ويـــــاك
ياجرح الاشوفة عدي مـــــــنه شــــكد
وعة بيك الورد شافك شــتلت سهــــام
نايم سوة روحة حتــــــــى مايشـــــهد
واسئل جفن عيني حــتى ادينــــك بي
عن لايحجي اكله بيهه جنـــت ارمــد
اشيل ضماد جرحي تريد لاموهيــــــــــــــج؟
انته اسئلني الاول انه جرحي انشـد ؟
يستشري الحزن واستاصــلة كل يــــوم
الى ان اخبروني ان حزنك قــــــد
وصل حالة صعب منك بعـــــد ينشــال
جروحك بي مجلبــــة جـــذره بيهه امتــد
كضى وكتك مثل ما خلص وكتـــــــــي بيــوم
وين تريد احطك باب كلـبي انســد
الرذاذ ال علورد صح ندى بـــــــس لو طاح
تتغيراوصافه مو ندى ينعـــــد
بس ايجوز اذا حرا الشمس يجـــــــــــــــويه
يتبخر يجوز وللورد يصـــــــعد
علما شوف دمي ينكطــــع لو لا
من حرة صــــوابي تنطـــفي وتبرد
زين انته بقيت انـــه وراي وياك
انه مارحت عني مابقالي احـــد
موجرة مكص بس ماكو اثر جفـين
جابصمات ظلت لو بفـــــعلة يـــد
فرق يوسف بريء اتضح مـــــــن تهمو
تقنعني قميصك من دبـــر ينقــد
يوسف من لبــــس جان القميص كدار
بس انتــــــه قميصك بي زغر ماكــد
اريد اقضي بجريمة ماكوبيهه شهود
بس كلمة انساني والزعل والصـد
عندي المشكلة ابين الجرح والسيف
سيفك ؟جرحي ؟كلي يالاول هـــد
ولهذا انه كلما اوصل انطي احكام
اكول الجلسه هسه تنرفع للغـــد


على شفاف الجرح
على شفاف الجرح طعم الخسارة ايطيح
يدري بطعمه مر ويشتهي مجبور
بي خيرته ماخيرته بيـــــــن اثنين
مااسمح بغيره وماعدا محضور
ردته يموت جرحي وخاطرة مجبور
حي ماردته يبقى وخاطرة مكسور
ينزف ذكرياتك ضال احتـــــــــــــــار
انتــــه اتدوربية لوالدم اتدور
لان حافر بخدي للدموع كبــــــــــور
من امسح دموعي جنت اهدم كبور
تعرفهه القصيدة الالي من الدخــان
رمــــــاد يطير منهه لاتظن طيور
من يدري القلم كاتبهه الك يغتاض
ويشكك صورك والقوافي اتثور
مملكتك بروحي انقاظ ظلت ليش؟؟
مالك اثر بيهه بس بقايا قصور
لاعرشك لكيتة لااثـــــــــــر للتاج
لاظلت رعية لاحـــرس عالسور
انه دورتك ورديـــــــــت مالاكيك
رد جيش امنياتي منسحب مكسور
وانه خايف لان عد ذكرياتك سيف
انه بس جرح شايل من خفت معذور
حتى أبياتي احس صارت مشانق ليش؟
على ركبة خيالي المفردات أتدور
بارض اوراقي اكو معتقل مابي باب
بي مقصلة لشعري وبي كبر محفور
على كل سطر ملتف سلك شائك حاد
خاف الكه القصيدة ذابحتهه سطور
تدري شكمت اسوي حتى اوصف بيك؟
كمت اترك المطلع على اوراقي شهور
اذب جرحي طعم حتى الصور تلكاه
اذا حسن خيالي بي جرح منثور
واتناساه جذب بس انه بالي وياه
ويلتمن واكضهن واكتشفهن زور
اردقلمي مثل كلكامش من يعود
من فكرة بخيالي عابرلهه بحور
وتلاكي نوارس ذكرياتك بيض
بس من يوصلنله يكتشفهه صكور
صح شارد فكر بس عن حذر مو خوف
لان مملحة ضعفي علجروحي تجور
انه شفتك بعت ماطاح بذني السوم
لوعالسمع سهلة علسمع مكدور
اذل روحي نعم بس موالك للزين
انه يم الشماته بالعكس مغرور
اضم جرحي بقبو حتى الضوة يعميه
شني من جرح عندي ينعمي بالنور ؟؟
من تحطني بجمر شتريد ثلجي يذوب؟؟
خل تبرد جروحي وانجمد مشكور
صح ابرد اذا بعيوني دمعة اتطيح
بس اكتشف بيهه شاعريتي تفور


حقيقة شفايفج
حقيقة شفايفج لو رسم مرسومات
شايفهن ولكن بالاوصاف احتار
من بعد بيهن لون حب رمان
ومن عن بعد وردي مكاسراته بنار
انه محار بيهن جاوبيني شلون
ماكبرن وياج وظالات زغار
لوما صايرات اجمل شفاف ايجوز
جابلعود هسه صايرات اوتار
ظل اشبار عنهن ترة من ادنيت
بس حسيت بيني وبين موتي اشبار
انه ماريد امر بيهن برمشة عين
مو صاحب طويلة جايهن حطار
اريد اسكن عليهن كون حد ماموت
واحلم قوك منهن كون تنحط دار
لو تنطينهن قط مايردن ليج
جاكتلج انسيهن ظامهن تذكار


جنة نرسم

جنة نرسم شوكنة فوك السوالف
وجنة نتوادع لمن تبجي الجفوف
وجنة من نظراتنه
ولو حجينة اثنينة ينام اليشوف
وجان مويوم الي مانتلاكة بي
ومن اشوفك نحمد الله اثنينة
شصار هسه شغيرك بيه السبب ؟
لو دخل واحد غريب ابينه ؟؟
ماتدري بية ؟؟
انه كدرت العمركله اعلكدك
وانه عفت الدنية كلهه وماردتهه وردت ودك
وانه حتى من ارد انام
كمت اشد كلبي بسناسل
ادري بي ...
من انام يغافل عيوني ...
ويجيك ينام عندك
ياثمر شتلة صباي وياثمر بالدنية كلهه بلون خدك
عسل واحلى من العسل ..
طعم العسل مايوصلك ويصير ندك


الى صديقي //المغترب رحمن الجبوري
ساكتة شفاف المدينة ...
او بالشوارع ذ كريات مطشرة ....بجف مرتبك ...
طايح وريدة ..
اهنا قصيدة ...
اهنا قصيدة..
اهنا نزع خطواتة كلهن يم محطات الوداع..
اومالبس خطوة جديدة ..
اهنا كتب قلمة مشيت الـ....
او ماگدرت اقرة العبارة جانت الورقة بعيدة ...
اهنا شمر خرخاشة ابنة ..عللتراب ..
اعللتراب ..
حتى لايزرع حقيقة وباجر تخضر سراب ...
او حتى لاتبقى امنياتة أتصفّن ابوجه العذاب ..
او تلتف ابجدمي شوارع ..
تطبع ابجدمي شوارع ...
تعصب عيوني شوارع ..
يامدينة بلا صدى ترضين اصيح ؟؟
خاف ماكمل طريقي وخاف اطيح
انة اجيت ...
ابشوگ اسير ..
ابدمع امير ..
رد عدل خسران بس حط دم جذب فوگ القميص..
حتى اذا سئلواقلهه ايجاوب ايگلهم جريح ..
انة اجيت ..
ابشوگ زاير ..
يحلم ايطب للضريح ..
انة اجيت ..
ابحيل دمعة ..
اتصيح هدوني ارد اطيح ..
واعثر اردود ابقصيدة ...بلاية شاعر..
بس عزيزة مبينة عندة ..
چان طاويهة بقصيدة ..
أبنص قصيدة ..
ابنص قصيدة ..
حتى لا تنزف مشاعر..
او حتى اذا حزّّّو نحرهة ..
ماتشوهه الحوافر..
اوحتى اذا دارت رحاهه تحتمي ابسد السواتر ..
او حتى اذا ماتت وحيدة ..
تندفن نص المگابر ...
وانة حاير ...
انة بس بهالمدينة ...
او ذكريات مطشرة ابجف مرتبك ...
تارك رسالة ...
وچان معناهة بوضوح (مسافرلخاطر جهالة )
اودورت عنة اشكثر بس مالگيتة ...
او من لگيتة چان عابر خط حدودي...
او ماگدرت اوصل خيـــــــــــالة
ماگدرت اوصل خيالة ..


تسئلمن
تسئلمن علية او وين تلكاني
انه بدمع عينك صار عنواني
بعد دمي علجفك وانته بس متهوم
وبسيفك بعدهن وصل شرياني
اخذت حجايتك عن مثل باب وريح
من ذاك الوكت سديت بيباني
انه زعلان بس مو مثل زعلي الراح
مااقبل بعد ينكسر حلفاني
زرعتك بيدي صح حد ماصرت بستان
بس هسه انتهينه وجنت بستاني
انه السورت روحي بكبر سور الصين
مو طابوك جرحك حجربنياني
شسولفلك تريد ؟احجيلك شسويت ؟
بيدك شككتني شلون تقراني؟
انه بصوتي هذا المايعجك شوف
من ونيتلك بجيت جيراني
انه الشجرة العفتهه بوكت شح الماي
وجفوف الغرب كسرت عوداني
سكف روحك جنت فيك ابصدري ايصير
بردت روحك وذبيت عمداني
بعد ماحب ورد مزروع يذبل خاف
او ينكطع ممكن بيد عدواني
صح ورد الصناعي من ورق مصنوع
بس سهلة من اعوفهه وسهل ينساني
انه ميت كبل لاموت مثل الناس
بس احفظ اسراري الوكت خلاني
متت موتت شعر عد شاعر اخر س صار
لايقراني غيرة ولاهو يقراني
انه تمثال هم تنمحي بظلة نجوم
انه نحاة جرحي وصرح سواني
اشكثر مرّو ابصفي شكثر فاتت ناس
بيه تنادسو من جتف للثاني
ربك ماكطع وكفت جروحي وياي
انعه جروحي مرة ومرة تنعاني
انه شاعر ولكن عللشفته وياك
كمت اضحك بصوت بوجه ديواني
انه مملكتي كاغد واعتزلته التاج
من كامت عليه تصول فرساني
انه عدة ايام الباقيات وياي
ومنيشن مجاني وجهز دفاني
كون المثلي هسة يشوف حاله شصار
مو كاعد اكتبلك شعر وجداني



حلوة بمعنى

حلوة بمعنى حلوة ومامبالغ بيج
ابحسنج دورو بس مالكو خلة
محلية المدرسة وتشهد الرحلة بهاي
حطيتي برحلتج ميت الف عله
دورة موصفج الي الطب مو كت وكتين
بالسبعة الدوام وبثنعش حلة
ماغير وقت توقيت شتوي وصيف
توقيتي من اشوفج ينكلب كلة
السبعة ونص وقت تعطش الشمس البي
ويجف ريجهه وبشوفج اتبله
وخصرج سيف حاد عيون ماتت بي
يدرن بي منية ورضن يمشله
لذلك حتى اموت اعترض دربج دوم
غير العندة سيف بشدته ايله ؟؟
يااحث زليخه الماتقد الثوب
واجمل من زليخة الصممج جله
يوم المااشوج بي احسة يروح
مومن عمري اكول وفدوة الج وله
يالتوصل وزير التربية اترجاه
خليلغي العطل وبقصتي اتكله
اذا تستمر عطله ابين يوم ويوم
يعني الخل بعد مايلتقي بخله


كلش باتصالك

كلش باتصالك واضح الصوت
بس مو واضحة كلش نبرتك

فرق كلش جبير ابين الاثنين
حرورة دمعي وبرودة ضحكتك

صوجك علمتني افتهمك بساع
تسكت وافتهم كلشي بنظرتك

امسح جفن عينك من الدموع
كبل لاتخنك ابصرك عبرتك

فهمتك وانه كلبي يعجبك بهاي
صوتك يوصله حتى بسكتك

ولاتعتذر عذرك عندي مقبول
خلهه مساتره وهيج افتهمتك

بعد لازم وراي ارجع للاحلام
ارد امسح صور بيهن رسمتك

اجيت ابالي مرة وصدكت جاي
بجيت وشبكة مسودن شبكتك

شبعد عندك حجي وشرايد تكول
تريد تعوفني وصلت فكرتك

حبيبي اتدلل ادري تريدني انساك
عــــــــفوا قصدي تدلل حضرتك

مدري شجابني وكلت اتصل بيك
اجه الليل وجنت وحدي وذكرتك


عرفتك من ردت تحجيلي موضوع
حجيته وغلبت حروفك حسرتك


وعرفتك من حجيت بطاري الوداع
عرفتك يمكن تطول سفرتك

قفلت احلامي والخط بعده مفتوح
وكلتلي وياك أي كتلك سمعتك

ردتني او صف وكتهه احساسي وياك
وردت تعرف الحصلته بعشرتك

وبجيت وكتلك انته اتخيل اتكون
نص المعركة وتعثر مهرتك؟

على كل الخلص من عمري ندمان
وعلى كل الوصل منك شكرتك

واهي حيره من اودعك ارجع منين
والمن جايك والمن تركتك

من ارد للشمس هسه بعيني ماشوف
يليلي انسيتهه بكد ماسهرتك

يلحالفلي بس ماتارك شهود
بس فراشك وحايط وغرفتك

انعم الله عليك كتلي وانه ممنون
منك على مجازاتي بعشرتك

وبعد ماتفرق انته تعود لو لا
على كل حال من عدهن خسرتك


القاتل الماجور
چنت سامع گبل بالقاتل الماجور
من الشمات ياخذ على الدم اتعاب
وانه ممنون منك جسدتلياه
گل للكلفوك الرايدينة انصاب
گالولك تلوحة وگلت طگة موت
ومن تلوح شاطر بالف طگة حساب
جبت بيدك ورد لمعة الخنجر بي
وانه مصدگ بشوفي وگلت لا چذاب
گتلك ذاك خنجر گلت خنجر وين ؟
حتى تخلني اامن طلعتلي گراب
متت مامشتكي وعرفت اسراري الناس
شامت گايللهم كاتلينة احباب
انه عشت بجرح بس من زمان وياي
من يلچم بيدي يطيح منه تراب
من قرالك قصيدة الندة دموع ايصير
وتون النوارس حدر جدمي اسراب
من دچيتني چنت ارد ابوسك جاي
يعني من التقينا چان عدنه اسباب
اجيتك والگمر مستحي ايشوف الشوگ
بس لمن صبتني ماتحمل غاب
انه بانيك چن قلعة ملك شبساع
هبت بيك ريح وصرت تل تراب
بست خدي وخفت بس گلت لا حلمان
اثر بوسة شفافك چان طبع انياب
لا تحسب ابياتي عتاب عود وياك
بس ويالعزاز ايصير عندي عتاب
انه بطلت اون بس الجرح بي نار
صح طفيته لكن ظال بي عطاب
من الفه ضماد بس حسبة ثواني ايطيح
لان مجنون جرحي وماتلمة ثياب
وانه ضميتهن دمعه وجرح مجنون
وتوالمن بيه وعايشات احباب
احلف عيوني منك كون دمعي يتوب
وانه شكي بمحلة ومامصدگ تاب
تهجم ذكرياتك وانه ابوابي هواي
اركض باب اسدة وغاد يوگع باب
انه ياباب افك حتى من اروح انساك
اهن لو گبر بيهن لو وراه سرداب

ميلاد جرحي
انه بميلاد جرحي اليوم غنيت
او جبت جكليت بيدي وشمعه وحده
او سهرت الليل اناطر شمعتي اتذوب
اعد ساعات ليلي ودمعي اعده
على ضماد الجرح طشيت جكليت
او على اكتاره بدّي خليت ورده
او جبت خنجر هدية عيد ميلاد
وبجرحي الرطب بهداي احده
كتبت اسمك ابورقه او كلت موجود
اوجن اتكول صوتك يمي بعده
تهمسلي واكلك وين ماوين؟
ماشفتك حبيبي صار مده؟
من يوم الرحت وعيوني لليوم
طيف ابغيرشوفك ماتوده
خليني الك بعده النفس بيك
واذا ضدنه الوكت خنصير ضده
ولا تزعل عليه اوغيضك امحيه
والراح امنديك اليوم رده
حبيبي ارجوك مابيه احمل اعتاب
او باب الذكريات ارجوك سده
تره ابلياك عمري ايام محسوب
يوم براحه اعيش او يوم شده
سنه ولاما نسيتك دوم علبال
او غيرك من يجيني ابلحظه اصده
اوكلبي لغير كلبك مارجف يوم
ولو كلبك نساني اوصار نده
انه وانته حبيبي وعيد ميلاد
عساهه ماكضت هاي المسيه
اولوادري تجيني اليوم ورتاح
صدّك ماجبت خنجر هديه
جاجبت العمر والروح والعين
منيتهن بديك اجمل منيه
حبيبي اكبال عيني وليل وشموع
اواديه مافاركنهن ذني اديه
هم يلفي الصبح وبغيرك اكضيه؟
اواكول البارحه جنه سويه
لا ماظن بعد تتحمل الروح
سنه او فوك السنه تحمل اذيه
حبيبي انه ادري بيك ابغيري مهموم
او ادري ابكلبك اصبح مواليه
لكن موبديه الروح تهواك
او تفرح من تجي وتصير يمي
اوازيل اهموم عمري ابشوفتك يوم

احسن بيك ماي امن اعطش اتصير
او احس بمحبتك تجري ويدمي
سميتك حبيبي او اغلى الاسماء
ونته بكيفك شمتريد سمي
بعتني ابيوم وانه امناطر اسنين
وانه للحين اريدك تشتريني
خلص ميلاد جرحي وخلص الليل
اوبده فجر النهار اتشوفه عيني
اوطفت شمعتنه ستكه والشمع ذاب
اوغفه جرحي اوبده يحسب اسنيني
اوبقيت الوحدي ادورك وين موجود
وانه ادري ابغيابك ماتجيني
اثاري الليل ذاك الراح حلمان
اوخيال الجان مابينك وبيني


لا تسال
ما فادت كبل تضحيتي وياك
عمر خلصتة يمك بس اضحي

لو ما احبك وما اريد اذيك
صدك جا نطيتك حتة جرحي

اخسرك كتلي اي بالله لاعاب
حلكك وشبّقه من الحيل لاعاب
من الاول وانه كلبي وياك لاعب
شماشوفك اكول يخون بيه

لاتسال شلونك ماشية احوالي
مثل ما شلت خشمك شايلك بالي

جبت عمري انطعن واصفن بعينك زين
بس كون الكة دمعة بعين جتالي

مو سعرك ولكن كلبي راد اشريك
غالي وجنت اعرفك واللة مو غالي

جنت غلطان من رحت بهذاك الراي
من امنت كاغد بالهوة العالي


جنت غلطان
جنت غلطان ما خذ غيبتك دوم
تحلفلي واجذبك وانهي العتاب

وتجي وتوكف وباب الروح مسدود
وچنت لغير حبك فاتح الباب

ادور فرصة حتة ازاعل وياك
وعلى كل كلمة اسوي حساب وكتاب

وارد زعلان منك ما اعرف ليش
واتركك من اروح ادور اسباب

اعوفك وادري روحك تمشي وياي
واخليك بگفاي دموع وثياب

واگلك محترك بس انة بردان
وتجي اطفيني واشتم بيك عطاب

يلگلبك وياي كتاب مفتوح
لكن وية غيري يصير سرداب

يلمرهمها بس مارهمت وياي
يل ماخذ بطولة بدور الاحباب

كلما باب تفتح حتة اراضيك
تلگاني بغيابك سادلك باب

تتناكث احلامك خوف وياي
مثل رجفت العش گبال حطاب

انا هديت چفك وردة وتطيح
وعلى خدودك الدمعة مهاجرة اسراب

يل منك دريت شلون مرات
اكو بين الدموع ادموع تنهاب

ياخيبة امل فلاح بعدين
درة بوكت الحصاد الذارة تراب

قلب شايل چفن رديتلك هيج
اخذ ثارك لان بيناتنة احساب

ولتسامح بعد للة في اللة
ولا تلزم الچف البي الظن خاب

وانا مزعلك بكد ما مفتر الميل
وكت بي چنت تحسب طول الغياب

اهي جانت غلطتي وفرطت بيك
وطن عفتك ورحت الديرة اغراب

اذا رايد تعرف شلون ندمان
شوف دموعي اذا طاريك ينجاب

اذا تذكر وعدتك مرة بالليل
عهد گتلك نظل لموتنا احباب

متت هسة ولكن نفسي موجود
وتتنفسك روحي وية الهوة الهاب

وهسة الدور الية واني اوصيك
اذاجرحك تلايم وانتهة وطاب

تجي تهل ذكريتك عل الگبر كون
لتخليهم ايهلوني تراب

وبعد من ثلج بالك تصنع احلام
لان حلم الصنعتة من الثلج ذاب

واذا حبيت بالك تعرف الناس
المرة الثانية يگولون چذاب








]d,hk hgahuv>>hdihf hglhg;d hgahuvhdihf pd,hk

المهندس دوت نت غير متواجد حالياً   رد مع اقتباس
قديم 07-22-2012   #2

كــــــــــبرياء أنــــــثى
عسول طاگ طگه للستار
 
الصورة الرمزية كــــــــــبرياء أنــــــثى

العضوٌﯦﮬﮧ » 50864
 التسِجيلٌ » Feb 2010
مشَارَڪاتْي » 2,672
 نُقآطِيْ » كــــــــــبرياء أنــــــثى is an unknown quantity at this point
افتراضي

رائع جداً

كم هوه جميل ذالك النص
كــــــــــبرياء أنــــــثى غير متواجد حالياً   رد مع اقتباس

الكلمات الدلالية (Tags)
المالكي, الشاعرايهاب, حيوان

الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

المواضيع المتشابهه للموضوع: ديوان الشاعر..ايهاب المالكي
الموضوع كاتب الموضوع المنتدى مشاركات آخر مشاركة
مجموعة ابو ذيات لكبار الشعراء رسول الحُب منتدى الشعر الشعبي العراقي 8 11-04-2012 03:26 PM
اسباب رحيل الشاعر العراقي القدير كاظم اسماعيل الكاطع(رحمه الله) ملاك الشوق قـــســـم الاخـبــار 4 06-27-2012 06:26 PM
ايهاب المالكي -مشتاكلك- ɱeяяy ɱαη منتدى القصائد المسموعة 0 05-20-2012 12:01 AM
ايهاب المالكي -تستاهل- ɱeяяy ɱαη منتدى القصائد المسموعة 0 04-05-2012 01:14 AM
شعر جميل للشاعر ايهاب المالكي كمرهم كلهم منتدى الشعر الشعبي العراقي 0 04-04-2012 05:26 PM


جميع ما يكتب في منتديات عسل بغداد لا يعبر عن رأي الادارة وانما يعبر عن وجهة نضر كاتبها والادارة غير مسؤوله عن ما يكتب او ينشر في منتديات عسل بغداد